خبرهای داخلی

افغانستان به تر ۵ کلونو پورې خپل صادرات۸ میلیاردو ډالرو ته لوړ کړي

 

ولسمشر غني د صنعت او سوداګرۍ وزارت د سرپرست او نوماند اجمل احمدي او کابل ښاروال احمدذکي سرفراز د معرفي په غونډه کې د افغان صادراتو د ریاتوالي ژمنې وکړې.

جمهوررئیس غني د سلاکار په توګه د اجمل احمدي د کړنو، د هغه د شخصیت، ظرفیت، هېواد ته د ژمنتیا او د انکشافي لیدلوري ستاینه وکړه او ويې ویل، د نړیوال بانک له لوري د ښو اصلاحاتو له امله افغانستان ته د لومړۍ درجې ورکولو کې احمدي ځانګړی رول درلود.

جمهوررئیس وویل، اجمل احمدي به د عبدالمجید زابلي په څېر له خصوصي سکتور سره په همغږۍ او همکارۍ اقتصادي وده زیاته او افغانستان له وارداتي څخه په صادراتي هېواد بدل کړي.

ولسمشر غني زیاته کړه، خصوصي سکتور سره د ښې همکارۍ او نږدې کار په پایله کې به افغانستان تر ۲۰۲۴ کال پورې خپل صادرات اته میلیاردو ډالرو ته لوړ کړي.

جمهوررئیس غني د کابل د نوي ښاروال احمدذکي سرفراز په اړه وویل، نوموړي د ښارجوړولو وزارت په چوکاټ کې له ساساکي کمپنۍ سره دکابل ښار د انکشاف په اړه ګډ کار کړی چې هم ستونزې ورمعلومې دي او هم یې د هغو په حل لارودقیق فکر کړی.

ښاغلي غني په خپلو خبرو کې وویل د افغانستان د پوهنتونونو له ظرفیتونو څخه تراوسه اساسي استفاده نه ده شوې. هغوی باید د دولت په طرحو کې د سلاکارۍ او اجرائیوي رول ولري، ترڅو اساسي بدلون رامنځته شي.

د ښاغلي غني به وینا ښاروالۍ باید په ځواب ویونکو بنسټونو بدلې شي او ښاریان په لنډ وخت کې اساسي بدلونونه وویني.

د ولسمشر ټینګار په دې وه چې زموږ معمارۍ باید زموږ اسلامي او ملي فرهنګ منعکس او ښارونه زموږ د فرهنګ استازیتوب وکړي.

د ولسمشر په وینا اسلامي او ملي ارزښتونه زموږ د تداوم بنسټونه دي او په تېرو څلورو کلنو کې چې د جوماتونو جوړولو او بیارغاونې ته څومره پاملرنه شوې، د افغانستان په تاریخ کې بېسارې ده.

د صنعت او سوداګرۍ سرپرست او نوماند وزیر اجمل احمدي د جمهور رئیس غني له باور څخه په مننې وویل، خصوصي سکتور سره همکاري، په صادراتي هېواد د افغانستان بدلول او د صنعت د ودې ملاتړ، هغه درې اصول دي، چې وزارت به ورته اساسي پاملرنه وکړي.

ښاغلي احمدي وویل، په ۲۰۱۹ کال کې یو ملیاردو ډالرو ته د صادراتو لوړول، د سوداګرۍ ودې ته پاملرنه، په نویو برخو کې د پانګونې زمینې برابرول، د صنعت سکتور سره همکاري او اصلاحات یې مهم لومړیتوبونه دي.

د ښاغلي احمدي په وینا د صادراتو اندازه باید اووه برابره لوړه شي او د وزارت کارکوونکي د خدمت فرهنګ پیاوړی کړي، ترڅو خپل واضح لیدلوري ته ورسېږو.

د کابل ښاروال احمد ذکي سرفراز دغه نوې ورسپارل شوې دنده امتیاز نه، بلکې هغه دروند مسوولیت وباله چې پر وړاندې یې زیاتې ستونزې او ننګونې پرتې دي.

هغه زیاته کړه، د کابل ښار زیاتې ستونزې یې په خپله لیدلي، تجربه کړي او فکر یې ورباندې کړی، نو له همدې امله به ورته اساسي رسیدګي وکړي.

سرفراز څرګنده کړه، د کابل ښار د پراختیا لپاره واضح لیدلوری، نقشه او پلانونه موجود دي، خو د ستونزو د حل لپاره دوه اړخیزه ژمنتیا او د ښاریانو همکاري مهمه ده.

هغه زیاته کړه،د ښاریانو د باور او ملاتړ جلبولو لپاره به د هغوی د رغنده نظریاتو د هرکلي ترڅنګ ښه والي، اسانتیاوو او نوښتونو ته پام ډېر کړي.

نظر بدهید